Iturria: Argia.eus 📷 Maitane Campos Fundazuri / Euskal Herriko Bertsozale Elkartea
Aukeratu zure maila:
Albiste sinplea, A1 mailarako
Amets Arzallus eta Beñat Gaztelumendi bertsolariak oso ondo aritu dira Euskal Herriko Bertsolari Txapelketako lehen finalaurrekoan. Larraun-Lekunberrin (Nafarroa) izan da saioa. Arzallusek 746,5 puntu lortu ditu, eta Gaztelumendik 733 puntu.
Arzallusek eta Gaztelumendik doinu berri bana ekarri dute bakarkakoan. Gaia emanda kantatu dute. Gaztelumendik Donostiako Bilintxi-Balantxa bertso txapelketan erabili zuen doinu bera.
Arzallusek denda bateko langilearen papera egin du. Bularreko minbiziaren aurkako eguna iristear zenean, denda jabeak erakusleihoa kolore arrosez ipintzeko agindu zion. Gaurkoa da horretan ari den eguna.
Gaztelumendiri, berriz, egokitu zaio guraso izan berri den musikariaren rolean ipintzea. Proposatzen dizkioten kontzertu askori ezezkoa ematen ari zaio, zaintzagatik.
Saioa Alkaiza ere oso ondo aritu da. Ausardiaz aurkeztu da hasierako agurretan. Mezu politiko ugari eman ditu: etxegabetzeak aipatu ditu gehienbat.
Xabat Illarregirentzat, Nafarroako egungo txapeldunarentzat, ez da egunik onena izan. Poto egin du zortziko txikiko lehen bertsoan.
Hurrengo saioa Eibarren izango da, urriaren 31n. Hauek dira kantuan ariko diren bertsolariak: Alaia Martin, Asier Azpiroz, Miren Artetxe, Nerea Elustondo, Nerea Ibarzabal eta Oihana Iguaran.
Albiste erraza, A2 mailarako
Amets Arzallusek eta Beñat Gaztelumendik saio ederra egin dute finalaurrekoen lehen faseko lehen saioan. Larraun-Lekunberrin (Nafarroa) jokatu da, Plazaola kiroldegian. Arzallus gailendu da 746,5 puntu bilduta, eta 733 puntu eskuratu ditu Gaztelumendik. Biek doinu berri bana ekarri dute gaia emanda kantaturiko bakarkakoan.
Arzallusi denda bateko langilearen paperean jartzeko eskatu diote. Bularreko minbiziaren aurkako eguna heltzear zenean, erakusleihoa kolore arrosez ipintzeko agindu zion denda jabeak, eta eguna iragatean atzera ere kentzeko. Gaurkoa da horretan ari den eguna. Honela kantatu du Arzallusek: “Dena biltzen ari naiz / ni haren peskizan / oihalak armairuan / betiko gerizan / ta kontzientziak dio / Amets zer zabiltzan / menpeko izateak / nola zarabiltzan / bitrina jantziko dut / hark nahi duen gisan / baina errukia utzi / dezala elizan / bitrina jantziko dut / hark nahi duen gisan (bis) / baina amu komertzial bat / ez dadila izan”.
Gaztelumendiri, berriz, egokitu zaio guraso izan berri den musikariaren rolean ipintzea. Proposatzen dizkioten kontzertu askori ezezkoa ematen ari zaio, zaintzagatik. Honela kantatu du Gaztelumendik: “Mikro aurrean askatu / ohi dut amorrazioa / ta jateko behar dugu / gure diru razioa / birak asko maite ditut / ta maite dut akzioa / baina uztartzen zail dira / bizitza ta pasioa / haur bat izan da guztia / aldatu didan zioa / bera zaintzera zuzendu / dut nire edukazioa / nahiz guraso izateak / daukan bedeinkazioa / gezur handi bat besterik / ez da kontziliazioa”.
Benetan ere entzuteko saio ederra izan da lehen finalaurrekoa. Ausardiaz aurkeztu dira bertsolariak hasierako agurretan. Fasez goratzearen bertigoari beldurrez batzuk, “hauxe da nire garaia” aldarrikatuta ekin dio saioari Xabat Galletebetiak adibidez, eta erantzunak emateko eta galderak egiteko grinez dela esan du Saioa Alkaizak, esaterako. Denak ere txapelketaren erronkari eusteko pronto agertu dira, indarrez, mezu politiko ugari emanda.
Hurrengo saioa, datorren larunbatean, Eibarren izango da, urriaren 31n. Hauek dira kantuan ariko diren bertsolariak: Alaia Martin, Asier Azpiroz, Miren Artetxe, Nerea Elustondo, Nerea Ibarzabal eta Oihana Iguaran.
B1 mailarako egokitutako berria
Amets Arzallus eta Beñat Gaztelumendi bertsolariek saio polita egin dute Larraun-Lekunberrin (Nafarroa). Arzallusek irabazi du 746,5 puntu lortuta, eta Gaztelumendik 733 puntu eskuratu ditu. Biak lehen aldiz aritu dira txapelketan, aurreko edizioko finalistak finalaurrekoetan sartu baitira. Biek doinu berria erabili dute bakarkakoan.
Arzallusek dendariaren papera hartu du. Denda jabeak bularreko minbiziaren aurkako egunean erakusleihoa arrosez janzteko agindu dio, eta gero kentzeko. Hauxe izan da Arzallusen hirugarren bertsoa: “Dena biltzen ari naiz / ni haren peskizan / oihalak armairuan / betiko gerizan / ta kontzientziak dio / Amets zer zabiltzan / menpeko izateak / nola zarabiltzan / bitrina jantziko dut / hark nahi duen gisan / baina errukia utzi / dezala elizan”.
Gaztelumendik guraso berri den musikariaren rola hartu du. Kontzertu askori ezetz esaten ari zaio, zaintzagatik. Gaztelumendik honela planteatu du gaia: “Mikro aurrean askatu / ohi dut amorrazioa / ta jateko behar dugu / gure diru razioa / birak asko maite ditut / ta maite dut akzioa / baina uztartzen zail dira / bizitza ta pasioa / haur bat izan da guztia / aldatu didan zioa / bera zaintzera zuzendu / dut nire edukazioa / nahiz guraso izateak / daukan bedeinkazioa / gezur handi bat besterik / ez da kontziliazioa”.
Saio polita izan da. Bertsolariak ausardiaz aritu dira. Mezu politiko asko eman dituzte: etxegabetzeak, greba, transfobia, faxismoa, euskarafobia… Gaiak lotura izan du bertsotarako.
Zortziko handian, Alkaiza eta Galletebeitia migrazioari eta xenofobiari buruz aritu dira. Ceutan kokatu dituzte, GKE batean boluntario moduan. Laguntza humanitarioa ematen diete berriki muga gurutzatu eta pobrezian kalean bizi direnei. Baina ez dute lan erraza, mehatxuak, sabotajeak eta jipoiak jaso baitituzte.
Alkaiza kirol klubeko zuzendaritza posturako hautagaiaren larruan ipini dute. Txalotua izan da oso Alkaizaren bertso hau: “Don Joxe oraingo lehendakaria / omen da horren gizon ilustre / ‘benga Saioa, anima zaitez’ / zenbat koipe, zenbat lustre / eta nik ‘ez, ez’ erantzun diot / ez naiz zu bezala, hantuste / eta karguan baietz egarri / gero mila buru hauste / beti aldarrian naiz ni / horren tinko urtez urte / eta kolpeak bizkar ertzean / dena irri, dena azukre / zinez hartuko nuke kargua / ez zalantza, ez itute / oinarritikan nesken kirola / bultzatu izan balute”.
Xabat Illarregirentzat ez da egunik onena izan, poto egin baitu zortziko txikiko lehen bertsoan. Baina bakarkako ariketan eroso sumatu zaio etxejabearen paperean. Honela bota du bigarren bertsoan: “Nahiz eta saldu ohi dizkiguten / bai telebistak, bai prentsak / bete ezin diren ametsak / gaur arte nigan sentitu ditut / hilabeteroko fetxak / angularik ta kabiarrik ez dut / gure armairuko despentsak / horiek gure defentsak / azkenerako teilatupe hau / hartu ahalko dut etxetzat / baina aukera hau izango al da / nere seme-alabentzat?”.
Hamarreko txikia ere ariketa polita izan da. Galletebeitia eta Pagonabarraga unibertsitateko psikologia graduan hasi berri diren bi ikasle izan dira. Adin tarte aski diferentekoak: Galletebeitiak batxilergoa amaitu berri du, eta Pagonabarragak soldatapeko lana utzi eta psikologia ikasi nahi duela erabaki du. Galletebeitiak lehenbizi honela bota dio: “Psikologiarako / ateak zabaldu / zu bigarren aukeran / ta ni bala galdu / bionak esanahia / berez izan badu / gazteok osasuna / geuretzat daukagu / ta aldi berean inoiz / ez dela berandu”. Pagonabarragak honelaxe dotore aurkeztu du bere pertsona: “Zu antza bala galdu / ta ni bala galkor / edadetua baina / etorri naiz jator / utzi gura nituzke / konpleju denak hor / psikologiaz dena / dakit jada baikor / dakidanari hitzak / ipintzera nator”.
Hurrengo saioa Eibarren izango da, urriaren 31n. Hauek dira kantuan ariko diren bertsolariak: Alaia Martin, Asier Azpiroz, Miren Artetxe, Nerea Elustondo, Nerea Ibarzabal eta Oihana Iguaran.